News

ప్రతి భక్తునికి దివ్యమైన దర్శనం

ప్రతి భక్తునికి దివ్యమైన దర్శనం

కాణిపాకం, న్యూస్‌టుడే: ఆంగ్ల సంవత్సరాది సందర్భంగా స్వయంభు శ్రీ వరసిద్ధి వినాయకస్వామి వారి దర్శనార్థం వచ్చే ప్రతి భక్తునికి దివ్యమైన దర్శనం కల్పించే విధంగా అన్ని ఏర్పాట్లు చేస్తున్నట్లు చిత్తూరు ఆర్డీవో కోదండరామిరెడ్డి తెలిపారు. మంగళవారం ఆలయ పరిపాలన భవనంలో జిల్లా స్థాయి అధికారులతో ఏర్పాట్లపై సమీక్ష సమావేశం నిర్వహించారు. ఈ సందర్భంగా ఆయన స్థానిక విలేకరులతో మాట్లాడుతూ…. ఉదయం 6 గంటల వరకు… సాయంత్రం 6 గంటల తర్వాత వీఐపీల కోసం ప్రత్యేక సమయం కేటాయించినట్లు తెలిపారు. ఈ క్రమంలో భక్తుల రద్దీకి అనుగుణంగా ప్రత్యేక, ఉచిత దర్శనాలకు వేర్వేరుగా క్యూలైన్లు ఏర్పాటు చేస్తున్నట్లు వివరించారు. చిత్తూరు, తిరుపతి ప్రాంతాల నుంచి ప్రత్యేక బస్సు సర్వీసులను తిప్పాలన్నారు. చిత్తూరు నుంచి ప్రతి 5 నిమిషాలకు ఒక్క బస్సు వచ్చే విధంగా చర్యలు తీసుకొంటున్నట్లు వివరించారు. ప్రత్యేక వైద్య శిబిరాలు ఏర్పాటు చేస్తున్నట్లు తెలిపారు.

రద్దీకి అనుగుణంగా ఏర్పాట్లు
అనంతరం ఈవో పెనుమాక పూర్ణచంద్రరావు మాట్లాడుతూ… రాష్ట్ర దేవాదాయ, ధర్మాశాఖ అధికారుల సూచనల మేరకు ఆంగ్ల నూతన సంవత్సరం సందర్భంగా ఆలయంలో ఎలాంటి ప్రత్యేక పుష్ప, విద్యుత్తు దీపాలంకరణ చేపట్టడం లేదన్నారు. ఎక్కడా శుభాకాంక్షలు తెలిపే విధంగా ఏర్పాట్లు చేయడం లేదని వివరించారు. ఉదయం 3 గంటలకు స్వామివారి దర్శనానికి భక్తులను అనుమతిస్తున్నట్లు తెలిపారు. భక్తుల రద్దీకి అనుగుణంగా క్యూలైన్లు, వారికి అవసరమైన ప్రసాదాలు అందుబాటులో ఉంచుతున్నట్లు వివరించారు. ఆలయంలో అన్ని ఆర్జిత సేవలు రద్దు చేస్తున్నట్లు తెలిపారు. ఈ ఏడాది ద్విచక్ర వాహనదారుల కోసం ప్రత్యేక పార్కింగ్‌ను ఏర్పాటు చేసినట్లు తెలిపారు. చిత్తూరు డీఎస్పీ సుబ్బారావు మాట్లాడుతూ… 200 మంది సిబ్బందితో ప్రత్యేక పోలీసు బందోబస్తు ఏర్పాటు చేస్తున్నట్లు వివరించారు. సమావేశంలో శిక్షణ కలెక్టర్‌ కీర్తి, చిత్తూరు వెస్ట్‌ సీఐ ఆదినారాయణ, కాణిపాకం సర్పంచి కేసీ మధుసూదన్‌రావు, తహసీల్దార్‌ ప్రసాద్‌బాబు, ఆలయ ఏసీ హెచ్‌జీ వెంకటేష్‌, ఏఈవోలు కేశవరావు, రవీంద్రబాబు, సూపరింటెండెంట్లు స్వాములు, ప్రసాద్‌, అన్ని శాఖల అధికారులు పాల్గొన్నారు.

Leave a Reply

Your email address will not be published. Required fields are marked *